بازوﺅں اور ٹانگوں سے محرومی کولمبیئن مصورہ کا عزم زیر نہ کر سکی

25 جون 2014 (17:08)

بگوٹا(مانیٹرنگ ڈیسک) معذور افراد عام طور پر دوسروں کے رحم و کرم پر ہوتے ہیں مگر اگر کوئی اپنے دونوں بازوﺅں کے ساتھ ساتھ دونوں ٹانگوں سے بھی محروم ہوتو اس کے متعلق یہ تصور کرنا ناممکن ہوتا ہے کہ وہ دوسروں پر انحصار نہیں کرتے،مگر خدا نے بعض لوگوں کو ایسی ہمت اور عزم عطا کیا ہوتا ہے کہ وہ اپنے ارادوں کی راہ میں کسی معذوری کو حائل نہیں ہونے دیتے ، کولمبیا میں ایک ایسی خاتون مصورہ ہے جو پیدائشی طور پر اپنے دونوں بازوﺅں کے ساتھ ساتھ ٹانگوں سے بھی محروم ہے مگر یہ اپنے منہ میں برش پکڑ کر ایسی مہارت سے فن پارے تیار کرتی ہے، کہ دیکھنے والے حیرت زدہ رہ جاتے ہیں۔تفصیلات کے مطابق 24سالہ زولی سنگیونو جو پیدائشی طور پر اپنے دونوں بازوﺅں اور ٹانگوں کے بغیر پیدا ہوئی کا بچپن انتہائی مشکلات میں گزرا اس کے والدین کو اسے سنبھالنے اور پرورش کرنے میں بہت سے تکلیفیں سہنا پڑیں مگر والدین نے ہمت کرتے ہوئے اسے زندہ رکھا اور اس کے لیے ایک ایسی سیٹ تیار کرلی جس پر وہ آسانی کے ساتھ بغیر گرے بیٹھ سکتی تھی ۔زولی نے عام بچوں کی طرح ہی اسکول میں تعلیم حاصل کی اس دوران اسے مصوری کا شوق پیدا ہوگیا اور اس میں اس کے والدین کے ساتھ ساتھ اساتذہ نے بھی ہمت بندھائی اور آج وہ اپنے دانتوں میں برش کو اس طرح پکڑتی ہے جیسے کوئی آرٹسٹ اپنے ہاتھوں سے پکڑ کر پینٹگ کرتا ہے۔ میڈیا رپورٹس کے مطابق زولی کی اب تک بنائی جانیوالی پینٹگز کی متعدد نمائشیں بھی ہوچکی ہیں جبکہ زولی خود بھی کئی سکولوں اور معذور بچوں کے اداروں میں جاکر لیکچر دیتی ہے۔